Lebron iniligtas ang Cavs laban sa Wolves
CLEVELAND — Ang krusyal na supalpal ni LeBron James ang nagbigay-daan para sa kanyang buzzer-beating jumper at akayin ang problemadong Cavaliers sa 140-138 obertime win laban sa Minnesota Timberwolves.
Kumonekta si James ng isang fade-away jumper laban kay Jimmy Butler sa pagtunog ng final buzzer sa extra period para tapusin ang walong sunod na kamalasan ng Cleveland.
Ilang minuto matapos supalpalin ang potensyal na game-winning shot ni Butler sa huling 1.3 segundo ng extension ay tinanggap ni James ang inbound pass mula kay Jeff Green at tinirahan si Butler malapit sa foul line para wakasan ang eight-game losing slump ng Cavaliers.
“Once I caught it, I just trusted everything I've done in my career,” wika ni James, niyakap at pinagkaguluhan ng kanyang mga teammates.
“The way we've been playing, we needed that. He was very special,” wika ni Cavs coach Tyronn Lue, bumalik sa bench matapos magkasakit noong Martes sa Orlando.
Kumolekta si James ng triple-double mula sa kanyang 37 points, 15 assists at 10 rebounds sa loob ng 48 minuto.
Nilampasan ng three-time NBA champion si Zydrunas Ilgauskas (5,904) sa career rebounds list ng Cleveland.
Humataw naman si Butler ng 35 points, habang nagtala si Karl-Anthony Towns ng 30 markers sa panig ng Timberwolves.
Sa Miami, nagposte si James Harden ng 41 points, habang nagdagdag si Chris Paul ng 24 markers, 7 assists at 7 rebounds para pamunuan ang Houston Rockets sa 109-101 paggupo sa Heat.
Ito ang ikaanim na sunod na ratsada ng Houston at ika-10 sa huling 11 laban.
Sa Detroit, humugot si Griffin ng 11 sa kanyang 25 points sa fourth quarter, habang humakot si Andre Drummond ng 17 points at 27 rebounds para pamunuan ang Pistons sa 115-106 paggupo sa Brooklyn Nets.
Ito ang pang-limang sunod na arangkada ng Detroit, hindi pa natatalo sapul nang mahugot si Griffin mula sa isang trade sa Los Angeles Clippers noong nakaraang linggo.
Sa Phoenix, kumolekta si center LaMarcus Aldridge ng 23 points sa loob ng 28 minuto at pinangunahan ang San Antonio Spurs sa 129-81 paglampaso sa Suns.
Ito ang pinakamasamang kabiguan ng Phoenix sa kanilang kasaysayan.
Nauna nang nakalasap ang Suns ng 76-124 home loss laban sa Portland Trail Blazers sa kanilang NBA opener ngayong season.
Nag-abag si Patty Mills ng 18 points para sa Spurs.
- Latest