MANILA, Philippines — Naibulsa ni dating world champion Dennis Orcollo ang runner-up honors sa 2017 American 14.1 Straight Pool Championship na ginanap sa Diamond Billiards sa Midlothian, Virginia sa USA.
Lumasap si Orcollo ng 87-150 kabiguan sa kamay ni Konrad Juszczyszyn ng Poland sa championship round para magkasya sa $6,000 konsolasyon.
Napasakamay naman ni Juszczyszyn ang $10,000 premyo.
Nakapasok sa finals si Orcollo matapos patalsikin si four-time World 14.1 Straight Pool champion Thorsten Hohmann ng Germany sa semifinals sa iskor na 150-130.
Tinalo rin ni Orcollo si reigning World Pool 9-Ball titlist Albin Ouschan ng Austria sa quarterfinals.
Nakahirit naman ng tiket sa finals si Juszczyszyn nang payukuin nito si Warren Kiamco sa hiwalay na semis game, 150-139 upang pigilan ang all-Filipino finale.
Si Kiamco ang nagpatalsik kay 2017 World 14.1 Straight Pool champion Lee Vann Corteza sa quarterfinals habang pinayuko ni Hohmann si Alex Pagulayan sa kanilang sariling quarterfinal match.
Sunod na sasabak ang Pinoy cue masters sa US Open 9-Ball Championship na gaganapin sa Norfolk, Virginia.
Maliban kina Orcollo, Kiamco, Pagulayan at Corteza, sasabak din sina dating World 9-Ball champion Ronnie Alcano, World Games gold medalist Carlo Biado, Johann Chua, Jeffrey De Luna at Zoren James Aranas.