MANILA, Philippines — Muling nagbalik ang ningning ni two-time world champion Rubilen Amit nang pagreynahan nito ang 2017 Guri International 9-Ball Championship na ginanap sa Guri Sports Complex sa Guri City sa South Korea.
Inilampaso ni Amit si Wei Tsu-Chien ng Chinese-Taipei sa pamamagitan ng impresibong 9-2 desisyon para masiguro ang tumataginting na KRW 30,000,000 premyo sa women’s division.
Nagkasya naman sa KRW 15,000,000 konsolasyon si Wei.
Umabante sa finals si Amit matapos kubrahin ang makapigil-hiningang 9-8 panalo laban kay Park Eunji ng South Korea sa semifinals.
Tinalo rin ni Amit sina Lee Woo Jin ng South Korea sa first round, Kuo Szu-Ting ng Chinese-Taipei sa second round at Chen Chia-Hua ng Chinese-Taipei sa quarterfinals.
Nakapasok naman sa championship round si Wei nang talunin nito sina world champion Chen Siming ng China sa quarterfinals at kababayang si Chou Chieh Yu sa semis.
Ito ang unang titulo ni Amit matapos pumangalawa sa 2017 Southeast Asian Games sa Kuala Lumpur, Malaysia noong Agosto at sa 2017 Asian Indoor and Martial Arts Games sa Ashgabat, Turkmenistan noong Setyembre.
Sa men’s division, nagkasya sa runner-up trophy si SEA Games bronze medalist Johann Chua nang matalo ito kay Liu Cheng-Chieh ng Chinese-Taipei sa gold-medal match.
Gayunpaman, mag-uuwi pa rin ng KRW 15,000,000 premyo si Chua habang napasakamay naman ni Liu ang KRW 30,000,000 top purse.