MANILA, Philippines — Magbabakbakan ang matitikas na tankers sa Luzon para sa Universiade slots sa paglarga ng Philippine Swimming League (PSL) 121st PSL National Series ngayong umaga sa Sibul Spring Nature Resort sa Abucay, Bataan.
Magsisilbing qualifying tournament ang torneo para sa 2019 Summer World University Games na gaganapin sa Napoli, Italy gayundin sa international competitions sa Australia, Japan, Singapore, United Arab Emirates, India at Hong Kong.
Paglalabanan ang gintong medalya sa 6-under, 7-year, 8-year, 9-year, 10-year, 11-year, 12-year, 13-year, 14-year at 15-over sa boys at girls habang gagawaran naman ng Most Outstanding Swimmer trophy ang mangunguna sa bawat age band.
Kabilang sa mga lalahok ang mga college students na nagnanais maging bahagi ng pambansang delegasyon sa Universiade gayundin sina Micaela Jasmine Mojdeh, Marc Bryan Dula at Master Charles Janda na pare-parehong mga beterano na sa international competitions.
“We’re inviting everyone to participate in this leg. It’s their opportunity to showcase their skills since we’ll be selecting swimmers for international tournaments that we’ll be joining in the future including the 2019 Universiade in Italy,” pahayag ni PSL President Susan Papa. (CCo)