MANILA, Philippines - Napigilan ng Jose Rizal University ang matikas na kamada ng Batangas, 70-65 upang makisalo sa liderato sa 2017 PBA D-League Aspirants Cup kahapon sa Ynares Sports Arena sa Pasig City.
Naasahan ng Heavy Bombers si Ervin Grospe nang bumanat ito ng 20 puntos kasama ang tatlong rebounds para dalhin ang kanyang tropa sa ikalawang sunod na panalo.
Naramdaman din ang lakas ni Tey Teodoro na siyang umariba sa ikatlong kanto nang magtala ito ng pito sa kanyang 18 kabuuang puntos, para makuha ng Jose Rizal ang 11 puntos na kalamangan, 53-42.
“Just like every time, I tell my players to keep playing. Our defense today was a big improvement compared to our last game,” wika ni Jose Rizal coach Vergel Meneses.
Naglatag ng mainit na ratsada ang Batangas sa fourth quarter sa pangunguna ni Joseph Sedurifa para makalapit sa 58-61.
Subalit hindi ito nasustenihan ng Batangueños sa huling sandali ng laro matapos humarurot ang Heavy Bombers tungo sa panalo.
Nangibabaw si Sedurifa sa hanay ng Batangas nang magtala ito ng 18 puntos at anim na rebounds habang nagdagdag si CJ Isit ng 12 markers.
Sumulong ang Jose Rizal sa 2-0 para samahan ang AMA Online Education sa tuktok ng standings.
Naunang tinalo ng Heavy Bombers ang Blustar Detergent, 75-64.
JRU 70 - Grospe 20, Teodoro 18, Bautista 9, Lopez 7, Dela Virgen 6, Lasquety 4, Poutouochi 4, Sawat 2, Mate 0, Sabellina 0, Pontejos 0.
BATANGAS 65 - Sedurifa 18, Isit 12, Fortu 9, Ablaza 9, Dela Pena 4, Sara 3, De Joya 3, Mendoza 3, Laude 2, Inciong 2, Anderson 0, Revadavia 0, Delfinado 0, Menor 0.
Quarters: 18-18, 34-38, 55-44, 70-65.