MANILA, Philippines – Sa likod ng kanilang pang-walong dikit na pananalasa ay ganap nang inangkin ng Beermen ang No. 1 seat sa quarterfinal round.
Sumakay ang nagdedepensang San Miguel sa kabayanihan ni one-time PBA Most Valuable Player Arwind Santos sa huling minuto ng final canto para talunin ang Globalport, 106-100, sa 2017 PBA Philippine Cup kagabi sa Hoops Dome sa Lapu-Lapu City sa Cebu.
Ang panalo ang nagbigay sa Beermen ng 9-1 record, habang nagtapos naman ang two-game winning run ng Batang Pier para sa kanilang 5-4 baraha kasosyo sa ikalawang puwesto ang Ginebra Gin Kings, TNT Katropang Texters at Rain or Shine Elasto Painters.
Sa tournament format ay ang No. 1 at No. 2 teams ay magkakaroon ng ‘twice-to-beat’ advantage laban sa No. 8 at No. 7 squads, ayon sa pagkakasunod, habang magtutuos naman ang No. 3 at No. 6 at ang No. 4 kontra sa No. 5 sa dalawang best-of-five quarterfinals series.
Makaraan ang salaksak ni Terrence Romeo para sa 97-102 pagdikit ng Globalport ay nagsalpak si Santos ng dalawang free throws sa nalalabing 8.8 segundo para muling ilayo ang San Miguel sa 104-97.
Samantala, tatargetin ng Ginebra ang quarterfinals seat sa pagsagupa sa Phoenix ngayong alas-6:45 ng gabi matapos ang salpukan ng Alaska at Mahindra sa alas-4:30 ng hapon sa Philsports Arena sa Pasig City.
Kasalukuyang nasa isang two-game winning run ang Ginebra matapos gibain ang Meralco, 83-72, at ang Blackwater, 99-90.