MANILA, Philippines – Pinangunahan nina Philippine junior record holder Jerard Dominic Jacinto ng University of the East at Richelle Callera ng Butterfly of Novaliches ang mga record-breakers sa 106th Philippine Swimming League (PSL) National Series - 10th Sen. Nikki Coseteng Swimming Championships kahapon sa Diliman Preparatory School Swiming Pool sa Quezon City.
Pinagharian ni Jacinto ang boys’ 15-over 100m Individual Medley sa bendisyon ng 1:02.81 para tabunan ang 1:03.03 na naitala ni Paul Christian King Cusing noong nakaraang buwan.
Muling nanalasa ang 15-anyos na si Jacinto sa 50m backstroke nang magtala ito ng 27.17 segundo na mas maganda sa lumang rekord na 27.55 na kanya ring nailista noong Hulyo.
Hataw din si Callera ng bagong marka sa girls’ 6-under 100m IM (1:45.47) at 50m butterfly (45.16) gayundin si Aishel Cid Evangelista na umukit ng dalawang rekord sa boys’ 6-under 100m IM (1:38.47) at 50m backstroke (45.84).
Ang iba pang record breakers ay sina Aubrey Tom ng International Learning Academy of Cainta sa girls’ 9-year 100m IM (1:20.12), Mhikcoloe Abina ng San Sebastian College sa boys’ 50m butterfly (26.31) at Kyla Soguilon ng Aklan sa girls’ 12-year 100m IM (1:13.00).
Sumisid naman ng tig-dalawang ginto sina Micaela Jasmine Mojdeh ng Immaculate Heart of Mary College-Parañaque sa girls’ 10-year 100m IM (1:18.73) at 50m butterfly (33.89), Marc Bryan Dula ng Weisenheimer Academy sa boys’ 9-year 100m IM (1:22.16) at 50m butterfly (35.60), Andrea Jheremy Pacheco ng College of Saint Benilde sa girls’ 15-over 100m IM (1:13.74) at 50m butterfly (33.38) at Joana Cervas ng Aklan sa girls’ 100m IM (1:25.21) at 50m butterfly (38.03).
Namayagpag din ang Diliman Preparatory School standouts na sina Paula Carmela Cusing sa girls’ 13-year 50m butterfly (34.12), Albert Sermonia sa boys’ 11-year 100m IM (1:16.87) at Lee Grant Cabral sa boys’ 10-year 50m butterfly (38.50) gayundin sina Trump Luistro ng Legazpi sa boys’ 8-year 50m butterfly (43.60), Lowestein Julian Lazaro ng Isabela sa boys’ 14-year 50m butterfly (20.09) at Tara Beard ng British School Manila sa girls’ 6-under 100m IM Class C (2:39.06). Lumangoy din ng ginto sina Joey Del Rosario. Aalia Jaire Espejo at Charles Emmanuel Ticbaen.