MANILA, Philippines - Handang handa na ang Foton Pilipinas para sa AVC Asian Women’s Club Championship na magsisimula sa Sabado sa Alonte Sports Center sa Biñan City.
Galing ang Tornadoes sa sixth-place finish sa 2016 Select Tuna Thailand Volleyball League na ginanap sa Sisaket, Thailand kung saan umaasa si Italian coach Fabio Menta na maraming natutunan ang kanyang tropa sa naturang torneo.
Natalo ang Foton Pilipinas sa Sisaket na minanduhan nina Thai national team players Nootsara Tomkom at Pleumjit Thinkaow kasunod ang kabiguan sa kamay ng reigning Asian champion Bangkok Glass.
Aminado si Menta na hindi magiging madali ang kanilang tatahaking daan sa Asian meet.
Subalit optimistiko ito na aabot sa semifinals ang Pinay spikers na pangungunahan nina Americans Lindsay Stalzer at Ariel Usher kasama sina Jovelyn Gonzaga ng RC Cola-Army, Aby Maraño ng F2 Logistics, Jen Reyes ng Petron, at Foton mainstays Jaja Santiago, Maika Ortiz, Rhea Dimaculangan, Angeli Araneta at Ivy Perez.
Sasabak ang Ba’yi Army Shenzheng-China na babanderahan ni Asian U23 MVP Liu Yanhan at Olympic star Yuan Xinyue habang ang Bangkok Glass-Thailand ay pamumunuan nina Vietnamese middle blocker Nguyen Thi Ngoc Hoa at American wing spiker Ashley Frazier.