MANILA, Philippines – Kaagad nagpakita ng kanilang lakas ang nagdedepensang Iran matapos pabagsakin ang Chinese Taipei B, 73-61 sa pagsisimula ng 38th Jones Cup international basketball tournament sa Xinzhuang Gymnasium sa Taiwan.
Umiskor sina Behnam Yakhchali at Sajjad Mashayekhi, ang mga bagong kamador sa Iran national team, ng pinagsamang 34 points sa final half para sa kanilang tagumpay.
Ang iba pang mga nagposte ng panalo ay ang Chinese Taipei A, Egypt at Cal State U-Sacramento.
Pinayukod ng Taiwanese national team ang Japan, 76-55, habang tinakasan ng Egypt ang Korea, 74-73, at nilusutan ng Sacramento State Hornets ang India, 62-60.
Samantala, kasalukuyan kasagupa ng Mighty Sports Apparel team ng Pilipinas ang Chinese Taipei A habang sinusulat ito.
Sa labas ng playing venue ay may idinaos na rally ang mga Taiwanese civic groups at activists na nanawagan sa mga opisyales at sports authorities na palitan ang official name sa Taiwan mula sa Chinese Taipei.
Ngunit hindi ito nakaapekto sa dalawang Taiwanese teams.
Ang Taipei B ay ang cadet team ng Taiwan na inihahanda para sa University Games sa susunod na taon.