MANILA, Philippines – Ginulantang ng Arellano University ang nagdedepensang San Beda College, 2-1 upang masungkit ang kanilang ikaanim na sunod na panalo sa National Collegiate Athletic Association (NCAA) football tournament kahapon sa Rizal Memorial Football Stadium.
Napatatag ng Arellano ang kapit sa solong liderato tangan ang malinis na 6-0 rekord habang ang San Beda ay nanatili sa ikalawang puwesto taglay ang apat na panalo, isang draw at isang talo.
Inilista ng San Beda ang 1-0 maagang kalamangan nang maisalpak ni Connor Tacagni ang umaatikabong goal sa ika-38 minuto ng bakbakan.
Ngunit mas mabangis na Arellano ang lumabas sa second half nang agad na magpakawala ng isang goal si Charles Vincent Gamutan sa ika-54 minuto para maitabla ang iskor sa 1-1.
Isa pang malupit na atake ang inilatag ni Ronald Espinosa sa huling 20 minuto ng laban para kubrahin ng Chiefs ang 2-1 bentahe na sumelyo sa kanilang panalo. (CC)