Ngayong tumitindi ang tensyon ng China at U.S., saan kaya kikiling ang Pilipinas? Inaayos na umano ang pag-uusap nina President Marcos at U.S. President Joe Biden pero hindi matiyak kung sakop ng agenda nila ang tensyon sa Taiwan dulot ng iringan ng U.S. at China. Malamang ay oo.
Matindi na raw ang pangamba ng mga Pilipino workers sa Taiwan at nais na nilang magkaroon ng maayos na evacuation plan kung sakaling sumiklab ang digmaan. Nais kuning muli ng China ang Taiwan na dati nitong teritoryo. Pareho ang polisiya ni Duterte at Marcos, Jr. Ang Pilipinas ay kaibigan ng lahat at kaaway ng wala.
Puwede ito sa panahon ng kapayapaan subalit sa harap ng mga dumarating na tensyon, dapat tayong pumili ng papanigan. Mula pa noong pananakop ng mga Hapones, ang U.S. na ang laging kaalyado ng Pilipinas hanggang dumating ang Korean War at Vietnam War, shoulder to shoulder tayong nakipagdigma sa panig ng U.S.
Nais ng mga Pinoy sa Taiwan na makipagpulong sa Manila Economic and Cultural Office upang plantsahin ang isang evacuation plan kung magkaroon ng matinding kaguluhan. Hindi simpleng problema ang kinaroroonan ng daigdig.
Nakikita natin ngayon kung epektibo ang diplomatic stand ng Pilipinas tungkol sa usapin. Itatakda ang usapan nina Marcos at Biden sa United Nations General Assembly sa New York.