Sa atas ni Presidente Duterte, bubuo ng isang task force ang Department of Justice para imbestigahan ang Php 15-bilyong anomalya sa PhilHealth.
Para saan? Para ipakita sa tao na may ginagawa ang pamahalaan sa maituturing na monumental thievery sa naturang ahensya? Ok iyan kung talagang malalapatan ng karampatang parusa ang mga kasangkot sa tinaguriang PhilHealth Mafia na lumustay sa kontribusyon ng mga kasapi sa naturang ahensya.
Sa laki ng halagang nadespalko, pasok na pasok iyan sa plunder na pinapatawan ng pinakamabigat na parusang habambuhay na pagkakulong, at kung may parusang bitay, tiyak na tepok ang mga nagkasala.
Pero paanong hindi pagdududahan ng taumbayan ang sinseridad ng administrasyon para mapanagot ang mga salarin gayung sa simula pa lang ay naghayag agad ang Pangulo na hindi nawawala ang tiwala niya sa namumuno sa ahensya na si retired General Morales?
Kagaya siya ni Health Secretary Duque na sa kabila ng mga kapalpakan sa Department of Health ay nananatili pa rin sa puwesto dahil “trusted” ng Pangulo. Nagbakasyon nga pero hindi dahil sa anomalyang pinag-uusapan natin kundi dahil sa problema niya sa kalusugan. Iyan lagi ang nangyayari kapag may maselang usaping legal sa mga opisyal ng gobyerno: laging nagkakasakit.
Kaya kung bubuo uli ng investigative task force, huwag lang sanang pakitang-tao kundi talagang seryoso para magtamo ng hustisya para sa milyong kasapi ng PhilHealth na ang kontribusyon ay walang awang dinugas ng mga taong dapat sana’y pagkatiwalaan nila.