EDITORYAL - Daming pulubingayon
HABANG papalapit ang Pasko, parami nang parami ang mga pulubi sa Metro Manila. Dati ay mga Badjao lamang ang makikita sa kalye at nagpapalimos, pero ngayon, pati mga Aeta at Igorot nagkalat na. Karamihan sa kanila, nakapuwesto malapit sa traffic light para pag-stop ng mga sasakyan, kanya-kanyang lapit at nakasahod ang mga kamay. Mayroong kinakatok ang mga bintana ng sasakyan.
Karaniwang mga Badjao ang sumasampa sa mga pampasaherong dyipni. Mag-aabot sila ng sobre sa mga pasahero. Mayroong magtatambol gamit ang PVC pipe. Pagkatapos makulekta ang sobre, biglang tatalon sa dyipni. Marami sa kanila ang nasasagasaan ng kasunod na sasakyan.
Dumadagsa na rin ang mga Aeta at Igorot sa mga kalsada ng Metro Manila. Nakikipagkumpetensiya sila sa mga Badjao. Bagama’t hindi sumasampa sa mga dyipni, sinasalubong naman nila ang mga sasakyan kapag papalapit na sa traffic light dahilan para malito ang mga drayber sa biglaang pag-iwas. May mga nasasagi dahil sa biglaang pagtawid o pagsulpot sa kalsada. Katulad ng mga Badjao, karaniwang may kargang bata ang mga Aeta habang namamalimos.
Babala ng Department of Social Welfare and Development (DSWD) huwag magbibigay ng limos sa mga pulubi. Kapag binigyan ang mga ito, para na ring itinulak silang mamalimos na lamang habambuhay at patuloy na aasa sa iba. Hindi na sila gagawa ng paraan para sa sarili.
Pero kahit nagbabala na ang DSWD, marami pa ring may malalambot na puso ang naglilimos. Lalo pa ngayong Pasko na panahon ng sharing. Kahit bawal, aabutan ng P5 o P10 ang mga namamalimos. Minsan lang naman daw sa loob ng isang taon.
Nagbabala naman ang National Capital Region Police Office (NCRPO) na huhulihin nila ang mga namamalimos. Ipatutupad nila ang Presidential Decree 1563 o ang Anti-Mendicancy Law. Sabi ni NCRPO chief Director Guillermo Eleazar, delikado raw na masagasaan ang mga pulubi at ang mga ito rin ang nagdudulot ng trapik. Noong Martes, 142 pulubi ang nahuli sa Quezon City. Araw-araw na raw ang gagawing panghuhuli.
Kahit pa araw-araw manghuli ang mga pulis, hindi mapipigil ang mga pulubi sa pagpapalimos. Pagtalikod ng mga pulis, nariyan na naman ang mga pulubi. Dapat gumawa ng hakbang ang DSWD upang mapigilan ang pagdami ng mga pulubi. Tama lamang na hulihin sila pero bigyan nang pagkakakitaan kapag ibinalik sa kanilang probinsiyang pinagmulan.
- Latest
