Ang lahat sa bansa ay biglang nagulat
si Janet Napoles ay biglang lumantad;
Nang siya’y sumuko siya ay umiwas –
sa maraming api’t may hawak ng batas!
Kaipala’y takot buhay n’ya’y mawala
kaya si Napoles biglang nagpasya;
Tanging sa Pangulo siya nagtiwala
at dito’y amining siya’y nagkasala!
Ang pork barrel scam na kanyang pinasok
salapi ng bayan ang kanyang inubos;
Hindi lamang siya ang dapat managot
sana sa imbestiga walang makalusot!
Ang naturang scam matagal na ito
nakapagtatakang ngayon lang nabisto;
Mga kongresista at nasa Senado –
matagal na palang tayo’y niloloko!
Ang awtor ng scam si Janet Napoles
ngayong sumuko na gagawin pang witness?
Ang dapat sa kanya ay agad mapiit –
habambuhay siyang doon ay manangis!
Hindi naman lahat – congressmen, senador
na sangkot sa scam huwag nang lulusot;
Ang dapat sa inyo’y parusa ng Diyos –
bangungutin kayo habang natutulog!
Buwagin ang congress – dahil sa masama
wala nang eleks’yon dapat isagawa;
Governors at mayors siyang mamahala
Pangulo’t Cabinet siyang mangasiwa!