MANILA, Philippines — May malaking rollback sa petrolyo ang mga kompanya ng langis ngayong araw.
Magkakasunod na inanunsyo ng mga kompanya ng langis sa bansa ang pare-parehong halaga ng itatapyas nila sa kanilang mga produkto at sabay-sabay na ipatutupad ngayong Martes .
Kabilang sa mga maagang nag-anunsyo ang Pilipinas Shell, at Seaoil na magpapatupad ng P1.20 rollback sa kada litro ng gasolina, P1.85 sa kada litro ng diesel at P2 sa kada litro ng kerosene.
Kaparehong presyo rin sa gasolina at diesel ang gagawing rollback ng Cleanfuel, Petro Gazz at PTT na walang produktong kerosene.
Bumaba ang presyo ng petrolyo bunsod ng pagsasara ng ilang malalaking bangko sa Amerika, na nakadagdag sa pangamba ng global recession o paghina ng ekonomiya ng buong mundo.
Pero ayon sa ilang analyst, posibleng tumaas ang presyuhan sa mga susunod na linggo dahil sa pagtaas ng demand sa China bunsod ng pagbubukas ng kanilang ekonomiya. —
Angie dela Cruz