Barangay chairman, tinuluyan nang sinuntok na MMDA enforcer

MANILA, Philippines — Sinampahan na ng kasong direct assault sa Manila City Prosecutor’s Office ang isang barangay chairman sa lungsod na inaakusahang nanuntok ng isang tauhan ng Metropolitan Manila Development Authority (MMDA) sa isang clearing operations nitong nakaraang Martes.

Inireklamo ni Mark Anthony Medios, tauhan ng MMDA, si Chairman Rommel Bravo ng Barangay 51 Zone 4 sa Dagupan Street, Tondo.

Sa ulat, nagsasagawa ng clearing operations ang MMDA Task Force Special Operations sa naturang barangay nang sitahin ang isang vendo carwash na nakaharang sa bangketa at kalsada. Biglang dumating si Bravo at nagpakilalang may-ari nito.

Pinagsabihan ni Bravo sina MMDA Task Force Special Operations and Anti-Colorum Unit head Bong Nebrija at mga kasama na huwag galawin ang car wash at siya na ang kusang mag-aalis nito. Nagkaroon ng sagutan sa magkabilang-panig hanggang sa kusang umalis na lamang ang mga tauhan ng MMDA.

Ngunit bago ang komprontasyon kay Nebrija, sinabi ni Medios, na una na siyang sinuntok sa tagiliran ni Bravo nang abutan sila na kinakalas ang compressor. Hindi umano siya nakapagsalita agad at nagdesisyon na ipaalam na lang sa kaniyang supervisor na si Nebrija, kinalaunan saka nagsampa ng kaso sa Manila Police District- Geneal Assignment and Investigation Section.

Nakipag-ugnayan naman si Nebrija sa Department of the Interior and Local Government (DILG) para mabigyan din ng karampatang parusa si Bravo sa kaniyang inasal.  
Sa panig ni Bravo, iginiit niya na hindi siya nanakit at bagkus ay hinawi lamang niya si Medios.