MANILA, Philippines — Bagsak kalaboso ang isang pinaghihinalaang miyembro ng isang gunrunning syndicate na nag-ooperate sa Metro Manila at karatig lalawigan ng Bulacan makaraan itong masakote sa buy-bust operation ng mga awtoridad sa Caloocan, kamakalawa ng gabi.
Kinilala ni Criminal Investigation and Detection Group Northern Field Unit (CIDG-NFU) Chief P/Lt. Col. Nicanor Ladesma III ang nahuling suspect na si Nico Bonabon, 30, ng Brgy. Minuyan, Norzagaray, Bulacan.
Bandang alas-6:30 ng gabi, ayon kay Ledesma ng ikasa ang buy-bust operation sa bahagi ng C3 Road, Brgy. 21 laban sa target na suspect.
Hindi na nakapalag sa mga operatiba ang suspect matapos itong dakpin sa aktong tinatanggap ang pera mula sa isang undercover agent ng pulisya kapalit ng isang cal. 22 revolver na may anim na bala.
Sa intelligence report na nakalap ng National Capital Region-Criminal Investigation Unit (NCR-CIDU), si Bonabon ay kinilala bilang miyembro ng bagong organisadong sindikatong kriminal na binansagang ‘Nicko Gun-running Group’.
Nahaharap ngayon ang suspect sa kasong kriminal habang patuloy namang pinaghahanap ang mga kasamahan nito sa sindikato.