COVID-19 wave sa Metro Manila tuloy sa pagbaba
MANILA, Philippines — Tuluy-tuloy ang pagbaba ng COVID-19 wave sa National Capital Region (NCR) makaraang maitala sa 15.3% ang lingguhang positivity rate nitong Agosto 17 mula sa 17.2% noong Agosto 10.
Ang positivity rate ay ang porsyento ng tao na nagpopositibo sa virus mula sa kabuuang bilang ng taong sumailalim sa tests.
Naibaba na rin sa -8% ang ‘one-week growth rate’ sa rehiyon.
Naitala ang reproduction number sa 1.01. Ang reproduction number ay ang bilang ng taong maaaring mahawa ng isang indibidwal na may sakit.
Kung mas mababa sa 1 ang reproduction number, nangangahulugan ito na bumababa na ang impeksyon sa isang lugar.
Sa kabila naman nito, tumaas ang healthcare utilization rate sa NCR sa 40% mula sa dating 36% habang ang ICU occupancy rate ay nasa 36% mula sa dating 33%.
Nangangahulugan ito na mas maraming pasyente ang nalalagay sa malubha o kritikal na kalagayan dahil sa impeksyon ng virus.
Nitong Huwebes, nakapagtala ang Pilipinas ng 3,844,708 kabuuang kaso, kung saan nasa 36,115 ang nanatiling mga aktibo.
- Latest