MANILA, Philippines — Natimbog ng pinagsanib na puwersa ng Bureau of Customs (BOC) at Philippine Drug Enforcement Agency (PDEA) ang dalawang claimant ng tinatayang P27.4 milyong shabu na nasabat sa Port of Clark nitong nakaraang Miyerkules.
Sa ulat na isinumite kay BOC Commissioner Rey Leonardo Guerrero, unang nadiskubre ang isang shipment na idineklarang mga pintura na mula sa Silver Spring, Maryland, USA nitong Mayo 20.
Nang isailalim sa x-ray, nakitaan ito ng mga ‘organic substance’ kaya nagpatupad ng 100% physical examination. Dito tumambad ang apat na foil packs na naglalaman ng puting crystalline substance na pinaniniwalaang shabu.
Dinala ang mga ebidensya sa PDEA at isinailalim sa laboratory examination at nakumpirma na shabu ang kontrabando na tinangkang ipuslit.
Nitong Mayo 25 nang magkasa ng ‘controlled delivery’ ang BOC at PDEA sa Taguig City na nagresulta sa pagkakadakip sa dalawang tumanggap ng shipment.
Hindi na kinilala ng BOC ang mga naarestong suspek na nakaditine na sa PDEA Custodial facility at nahaharap sa kasong paglabag sa RA 9165 o Comprehensive Dangerous Drugs Act of 2022.