MANILA, Philippines — Inialok kahapon ni Philippine National Police (PNP) Chief P/Gen. Guillermo Eleazar ang mga kampo ng PNP para gawing vaccination sites sa mga kabataang 12-17 anyos partikular na ang mga dependent ng mga pulis.
Ang planong pagbabakuna sa 12-17 anyos na populasyon ay sa gitna na rin ng panawagan na magsagawa na ng face-to-face classes ang mga estudyante.
Nabatid na patuloy ang pagdating ng mga bakuna laban sa COVID kaya pinaplano na rin ng gobyerno na bakunahan ang 12-17 anyos kung saan ilang Local Government Units (LGUs) ang sinimulan na ring ang pagpapatala sa mga menor-de-edad.
“Ngayong halos patapos na ang vaccination sa aming hanay, inatasan ko na ang aming Administrative Support for COVID-19 Task Force (ASCOTF) sa pamumuno ni PLTGEN Joselito Vera Cruz na maghanda sa pamamagitan ng pag-umpisa ng paglilista ng mga 12-17 years old dependents ng aming uniformed at civilian personnel,” ayon kay Eleazar.
Ipinaliwanag ni Eleazar na ang paggamit ng PNP camps at iba pang mga pasilidad para sa menor-de-edad ay bahagi ng tulong ng kapulisan sa LGUs upang hindi magsiksikan sa mga lugar ng bakunahan.
“Makikipag-ugnayan ang inyong PNP sa NTF Against COVID-19 at sa Department of Health na gawing vaccination sites ang aming mga kampo para sa 12-17 years old dependents ng aming mga personnel upang maiwasan ang pagdagsa ng mga menor-de- edad sa vaccination sites ng ating mga LGUs kapag nag-umpisa na ang pagbakuna sa kanila,”ayon kay Eleazar.