MANILA, Philippines — Sinalubong kahapon nina Manila Mayor Isko Moreno at Vice Mayor Honey Lacuna ang pagdating sa Ninoy Aquino International Airport (NAIA) ng 400,000 doses ng bakuna mula sa Sinovac na binili ng lokal na pamahalaan.
Lumalabas na kauna-unahan ang lungsod, hindi lang sa Pilipinas, kungdi sa buong mundo, na nakabili na ng sariling set of vaccines.
Kasama rin ni Moreno sina Manila City Council Majority Floorleader Atty. Joel Chua, assistant secretary to the mayor Letlet Zarcal at Manila Health Department chief Dr. Arnold ‘Poks’ Pangan, na sumaksi sa pagdating sa inorder na P298.5 milyong halaga ng vaccines.
Ani Moreno, regalo ito sa mga Manilenyo kasabay ng pagdiriwang ng ika-450 founding anniversary ng ‘Araw ng Maynila’ .
Nabatid na alas-7:00 ng umaga ng Huwebes nang dumating ang Sinovac vaccines sakay ng Cebu Pacific flight fl 5J-671 sa Bay 49 ng NAIA Terminal 2.
Kasabay nito, isa pang regalo ng LGU sa Manilenyo ang inagurasyon ng Manila COVID-19 Field Hospital.