MANILA, Philippines — Mananatili pa ring suspendido ang pagpapatupad ng number coding sa kabila ng plano na paglalagay sa National Capital Region (NCR) sa modified general community quarantine (MGCQ) simula sa Marso.
Sinabi ni MMDA chairman Benhur Abalos na hindi pa nila nakikita ang pangangailangan na ibalik na ang number coding sa mga sasakyan.
Gayunman, posible rin aniya, na baguhin ang plano sakaling bumigat ang trapiko dahil sa pagluwag sa galaw ng mga tao at pangangailangan ng mga sasakyan sa kalye sa Metro Manila.
Kabilang sa paghahanda ng MMDA ang paghi-hire ng mas maraming traffic enforcers sa posibilidad na madagdagan ang mga sasakyan matapos manawagan na rin sa Department of Transportation (DOTr) kung maari nang payagan ang mas maraming public utility vehicles (PUVs) na isa sa napaka-importante para mabuhay ang ekonomiya.
Tiniyak ni Abalos na mag-aabiso na lang sila kung dapat nang ipatupad muli ang number coding.