Dating konsehal, itinumba sa Taguig
MANILA, Philippines — Patay ang isang dating konsehal ng Taguig City nang pagbabarilin ng hindi pa kilalang mga salarin, kamakalawa.
Kinilala ang biktimang si Richard Paul Jordan, dating konsehal ng Taguig City District 2, at residente ng Dinggin Bayan St., Brgy. Ibayo Tipas, Taguig City.
Sa ulat, dakong alas 10:00 ng umaga noong Huwebes nang pagbabarilin si Jordan ng dalawang lalaking armado ng mga baril sa tapat ng kaniyang inuupahang bahay sa Dinggin Bayan St., Brgy. Ibayo-Tipas, Taguig City.
Matapos ang pa-mamaril ay nagsitakas na ang mga suspek na pinaniniwalaang sumakay sa hindi naman natukoy na sasakyan habang ang biktima ay dinala sa Taguig Pateros District Hospital kung saan siya tuluyang binawian ng buhay.
Kahapon ay bumuo na ng Special Investigation Team ang Taguig City Police Station upang matukoy ang pagkakakilanlan sa mga suspek para sa ikalulutas ng kaso.
Narekober sa crime scene ang 8 basyo ng bala ng kalibre 45.
Kasunod nito, agad na iniutos ni Taguig City Mayor Lino Cayetano sa lokal na pulisya ang masusing im-bestigasyon sa pamamaslang kay Jordan.
- Latest
