MANILA, Philippines — Mandatory na ang pagsusuot ng helmet sa lahat ng bicycle riders sa loob ng Quezon City .
Layunin nito na mapangalagaan ang kaligtasan sa paglalakbay ng mga dumaraming bikers.
Ito ay makaraang aprubahan at lagdaan ni QC Mayor Joy Belmonte ang Ordinance No. SP-2942 na nag-uutos ng pagsusuot ng helmet sa lahat ng bicycle riders sa lungsod.
“Ngayong bahagi na ng new normal ang pagbibisikleta, nais nating gawing mas ligtas ang aktibidad na ito para sa mga dumaraan sa ating lungsod. Makatutulong ang pagsusuot ng helmet upang maging maayos ang ating pagbiyahe at para ligtas tayong makarating sa ating pupuntahan,” sabi ni Mayor Belmonte.
May kaukulang penalty na igagawad sa mga lalabag sa naturang ordinansa.
Sa ilalim ng Ordinance 2942, pagmumultahin ng halagang P1,000 sa first offense ang mga bicycle riders na walang helmet habang naglalakbay sa QC, P3,000 sa second offense at P5,000 sa third offense.
Una nang nagsagawa ng Bike Lane Project si Belmonte, isang short-term initiative na layong bigyan ng mas ligtas na lugar ang mga taong gumagamit ng bisikleta bilang alternatibong sasakyan ngayong panahon ng pandemic.