Mag-live-in partner, arestado sa P13.6 milyong shabu
MANILA, Philippines — Arestado ang isang mag-live-in partner matapos na mahulihan ng tinatayang aabot sa P13.6 milyong halaga ng shabu sa isang joint buy-bust operation na isinagawa ng mga tauhan ng Quezon City Police District (QCPD) at Philippine Drug Enforcement Agency (PDEA) sa Quezon City, kamakalawa ng gabi.
Kinilala ni QCPD director, BGen. Ronnie Montejo ang mga naarestong suspek na sina Jonathan Condeza alyas Tantan, 41, at kanyang live-in partner na si Maribel Salipot, 27, kapwa residente ng Brgy. Bagong Barrio, Caloocan City.
Batay sa ulat, dakong alas-10:15 ng gabi nang maaresto ang mga suspek sa isang buy-bust operation na ikinasa ng mga tauhan ng QCPD-Talipapa Police Station (PS 3) at PDEA RO-NCR-SDO, sa Home Land Subdivision, Brgy. Tandang Sora, QC.
Kaagad namang ipiniit ang mga suspek nang makumpiskahan ng may dalawang kilo ng hinihinalang shabu na nagkakahalaga ng P13,600,000, isang cellular phone at mga identification cards.
Ang mga suspek ay sasampahan ng kasong paglabag sa Republic Act 9165 o The Comprehensive Dangerous Drugs Act of 2002.
- Latest
