Isko sa mga informal settler

‘Wag magpaka-dugyot’

MANILA, Philippines  — Umapela si Manila Mayor Isko Moreno sa mga informal settler na baguhin ang nakagawiang pagtatapon ng basura sa mga estero at ilog at patunayan na ‘hindi porke squatter ay dugyot na’.

“HINDI porke squatter, kailangan ding maging dugyot. Baguhin natin ang maling nakagawian. Inuunawa kayo ng pamahalaan pero ‘wag sana nyo hintayin na isang araw maubos na lang ang pasensiya ng gobyerno”,ani Moreno.

Aniya, habang tuluy-tuloy lang ang ‘estero rangers’ sa clean-up operations sa mga daluyan ng tubig, dapat na ang mga residente ay makipagtulungan din sa pagpapanatili na walang basurang mapupunta sa mga ilog at estero.

“Tuloy-tuloy kami maglinis, tuluy-tuloy din kayo magtapon. Hindi ba nangangawit ang kili-kili ninyo sa katatapon ng basura? Huwag naman. Baka mamaya mapilitan kaming gibain namin kayo diyan. Di ho ba mas masaklap yun? Halimbawa napagod na lang ang gobyerno na unawain kayo, unang-una iligal po kayo diyan,” aniya pa.

Nilinaw niya na alam niya kung paano maging squatter at ano ang hirap ng walang sariling bahay subalit pwede namang sa pagiging walang bahay lang maturingang squatter ang isang tao at hindi sa pag-uugali o pagiging dugyot.

Paliwanag niya, hangga’t kaya niyang yakapin ay gusto niyang maibigay sa mga Manilenyo na nangangailangan ang pagkakaroon ng sariling pamamahay kaya niya naisip niya na magtayo in-city vertical housing na katulad ng condominium sa Tondo at Binondo.