MANILA, Philippines — Umaabot na sa 32 katao ang inaaresto ng Philippine National Police (PNP) matapos masangkot sa pagpapakalat ng fake news o mga maling impormasyon sa social media kaugnay sa COVID-19 pandemic.
Kasabay nito, muli namang nagbabala si PNP Spokesman Brig. Gen. Bernard Banac sa netizens na iwasan ang magpakalat ng fake news dahilan may katapat itong kaparusahan sa ilalim ng batas.
Sinabi ni Banac na sa report ng PNP Anti-Cybercrime Group, 24 na suspect ang naaresto sa pagpapakalat ng fake news sa social media portals hinggil sa COVID-19 bagay na higit pang lumikha ng pagpapanik sa publiko.
Samantalang nasa 8 suspect naman ang nasakote ng PNP Regional Offices at PNP Criminal Investigation Group sa mga nagpapakalat ng maling impormasyon sa COVID 19.
Ayon kay Banac ang 32 nasakoteng fake news proliferators ay nahaharap sa kasong paglabag sa unlawful use of means of publication and unlawful utterances sa ilalim ng Article 154 ng Revised Penal Code na inamyendahan bilang Sec 4c4 (Online Libel) at Section 6 ng Republic Act No. 10175, o ang Anti-Cybercrime Law.
Inihayag ni Banac na simula Marso 9 hanggang nitong Abril 5, 2020 ay nakapagtala ang PNP-ACG ng 32 reklamo na ini-inquest para sa preliminary investigation kung saan 17 kaso na ang naisampa.
Ang mga nasakote ng cybercops na mga suspect ay mula sa Quezon City, Eastern Visayas, Central Visayas, CALABARZON, MIMAROPA, Western Visayas. Zamboanga Peninsula, at CARAGA Region.
“The PNP-ACG under P/Brig. Gen Dennis Agustin will be relentless in taking countermeasures on misinformation and spread of fake reports by conducting cyber patrol operations on social media and other online platforms”, ani Banac.
“The public is urged to cooperate in taking greater steps to topple the COVID-19 pandemic, including to refrain from sharing and posting false reports that may cause panic and confusion”, ang sabi pa ng PNP Spokesman.