2 Cameroon national nandura sa Pinoy trader, kalaboso
MANILA, Philippines — Kalaboso ang dalawang Cameroon national makaraang duraan ang isang negosyanteng Pinoy na naniningil sa kanilang utang sa loob ng isang hotel sa naturang lungsod kamakalawa ng hapon.
Kinilala ang mga inaresto na sina Febian Mota-ngongoh, 36, at Kelvin Acha 28, kapwa nanunuluyan sa Dusit Thani Hotel sa Ayala Center, Makati City.
Sa ulat ng pulisya, naganap ang insidente dakong alas-2 ng hapon sa loob ng nasabing hotel sa may Ayala Center, Brgy. San Lorenzo, ng naturang lungsod.
Nakipagkita ang biktimang si Frandel Esmeralda, 43, negosyante ng Brgy. San Antonio Ortigas, Pasig City sa dalawang dayuhan para singilin ang malaki nilang utang na hindi na binanggit kung magkano.
Sa gitna ng usapan, nagsisigaw at pinagmumura na umano ng mga suspek si Esmeralda hanggang sa duraan siya sa mukha ng mga ito.
Sa tulong ng kaniyang mga kasamahan na sina Jester Sumido at Jhon Rey Sumido, ipinatupad nila ang citizen arrest laban sa dalawang dayuhan.
Pasado alas-8 na ng gabi nang isuko sa Makati City Police Station Investigation and Detective Management Section ang mga dayuhan.
Nahaharap sila ngayon sa mga kasong Unjust vexation at oral defamation sa Makati City Prosecutor’s Office habang nakipag-ugnayan na sa kanilang embahada ang pulisya.
- Latest
