Grupong Panday Sining, ipinaaaresto ng DILG
MANILA, Philippines – Ipinag-utos ng Department of the Interior and Local Government (DILG) ang pag-aresto sa grupong Panday Sining upang maparusahan sa kanilang ginawang bandalismo sa dingding ng Lagusnilad underpass sa Maynila.
Ayon kay DILG Undersecretary at Spokesman Jonathan Malaya, nakakahiya ang ginawang pambababoy ng naturang grupo sa Lagusnilad, na sinisikap na linisin at ayusin ng lokal na pamahalaan ng Maynila.
Giit pa niya, dapat na istriktong ipatupad ng mga local government units (LGUs) ang mga panuntunan laban sa bandalismo, at gamitin ang mga CCTV cameras sa mga lugar upang mahuli at mapanagot ang mga sangkot dito, alinsunod sa kanilang kampanya na #DisiplinaMuna.
“Nakakahiya ang ginawang pambababoy sa Lagusnilad pagkatapos itong linisin at ayusin ng Manila City government,” aniya pa. “LGUs should, therefore, see to it that they strictly enforce their laws on vandalism so that vandals will face the consequences of their actions.”
Inihalimbawa rin naman niya ang Marikina City na may kakaunti lamang na kaso ng bandalismo dahil sa epektibo nitong anti-vandalism drive sa kanilang lokalidad at pinagmumulta ang mga taong lumalabag dito. Batay aniya sa ulat ng Marikina City Police, tatlo lamang ang nahuli nilang lumabag sa bandalismo noong 2018.
Nanawagan din siya sa Philippine National Police (PNP) na arestuhin ang mga lumalabag dito, dahil ang bandalismo aniya ay isang uri ng ‘malicious mischief’ sa ilalim ng Article 327 ng Revised Penal Code.
Una nang humingi ng paumanhin ang Panday Sining sa kanilang ginawang pagsusulat ng protest statement sa mga dingding ng underpass ngunit iginiit na lehitimo naman ang kanilang mga hinaing.
Matatandaang ikinainis din ni Manila Mayor Isko Moreno ang ginawa ng grupo at nagbanta na sa sandaling mahuli niya ang mga gumawa nito ay ipadidila niya sa kanila ang mga sulat hanggang sa mabura ang mga ito.
- Latest