Bomba sumabog sa maximum compound ng Bilibid
MANILA, Philippines — Isang malakas na pagsabog ang umalingawngaw sa loob ng New Bilibid Prisons (NBP) sa Muntinlupa City habang patuloy ang ginagawang “clearing operations” ng mga tauhan ng Bureau of Corrections (BuCor) sa mga ilegal na istruktura ng mga bilanggo.
Sa inisyal na ulat, naganap ang pagsabog dakong alas-10 ng umaga sa Quadrant 1 East sector ng Maximum Security Compound. Isang improvised explosive device (IED) ang sumabog.
Agad na rumesponde ang mga K9 team ng Explosive and Ordinance Division na sinuyod ang lugar. Dito natuklasan ang dalawa pang granada sa loob ng isang kubol malapit sa lugar ng pagsabog.
Ayon sa NBP, ang naturang lugar ay inookupahan ng mga bilanggo buhat sa mga extremist groups na Abu Sayyaf, Maute Isis, Rajah Solaiman Group, Jemaah Islamiuah at Moro Islamic Liberation Front (MILF).
Masuwerteng walang nasaktan o nasawi sa insidente kahit na kasagsagan ng demolisyon sa mga kubol ang ginagawa sa lugar.
Ayon kay Major Alberto Tapiru, tagapagsalita ng NBP, na kinukunsidera nila na maaaring reaksyon ng mga maimpluwensyang bilanggo ang pagpapasabog sa ginagawang paghihigpit. Maaaring hinahayaan lamang sila sa demolisyon ngunit nagtanim naman ng bomba laban sa mga awtoridad.
Patuloy pa rin ang imbestigasyon ng NBP at pulisya sa insidente para makilala ang mga taong nasa likod ng insidente.
- Latest