5 suspek sa Metrobank holdap, tukoy na!
Parojinog Group ang nasa likod
MANILA, Philippines — Parojinog group ang siyang nasa likod sa panloloob sa Metrobank sa Binondo kung saan tinukoy na rin kahapon ng pulisya ang limang sangkot dito.
Sa ginanap na press conference kinilala ang mga suspek na sina Marlon’ Ailon’ Parojinog, na siya umanong tumatayong lider ng grupo; Noli Bonifacio Casuela, Gilcar Dumagan Mofan, Frederex Secretario at isang Michael, na may alyas na Alyas Pilay at Batang Calunod.
Ayon kay Manila Mayor Isko Moreno, nakakuha na rin ng ilang larawan sa loob ng Metrobank ang mga tauhan ni Manila Police District Director Brig. Gen. Vicente Danao kung saan makikitang may hawak pang pera ang isa sa mga suspek.
Ang ipinagtataka lang umano ni Moreno ay ang patuloy na pagtanggi ng banko na makipagtulungan sa mga awtoridad sa pagbibigay ng halagang nakulimbat ng mga suspek gayung naka-insured naman ito sa PDIC.
Dahil dito sinabi ni Danao na mas tumitibay ang kanilang imbestigasyon na inside job ang insidente.
Binigyan diin ni Danao na ang mga suspek ay positibong kinilala ng mga witness sa loob at labas ng banko.
Paliwanag naman ni Danao, konektado si Marlon ‘ Ailon’ Parojinog sa mga Parojinog ng Ozamis City na sangkot din sa robbery at Rey Parojinog na sangkot sa illegal na droga.
Umaasa si Moreno na mas magiging madali ang pagdakip sa mga suspek dahil malinaw na ang mga mukha nito bukod pa sa P1 milyong reward na ibibigay ng city government sa makapagbibigay ng impormasyon sa ikadarakip ng mga suspect.
- Latest