MANILA, Philippines — Natimbog ng mga awtoridad ang isang Indonesian national na may dalang mahigit sa 1.6 kilo ng ‘cocaine’ na nagkakahalaga ng nasa P9 milyon matapos itong dumating sa Ninoy Aquino International Airport (NAIA) Terminal 3, kahapon.
Kinilala ang nadakip na si Agus Burhan, 62.
Si Burhan ay sakay ng Qatar Airways flight QR 932 na lumapag sa NAIA T3.
Nabatid na nakatago ang cocaine sa isang secret compartment ng bagahe ng suspect.
Samantala, itinanggi ni Burhan na sa kanya ang drogang nakumpiska, gayunman makikipag-tulungan umano ito para maituro at mahuli ang nagbigay sa kanya ng cocaine.
Nakatakda namang sampahan ng kaukulang kaso ang nasabing dayuhan.