MANILA, Philippines — Patay ang isang 55-anyos na manikurista makaraang pagbabarilin nang malapitan ng isang hindi pa nakilalang lalaki sa tapat ng kanyang bahay sa Navotas City, kahapon ng madaling araw.
Nagtamo ng mga tama ng bala sa ulo at katawan ang biktimang nakilalang si Carina Agustin, nakatira sa Pantalan 1, Brgy. Tangos South, ng naturang lungsod.
Sa ulat ng pulisya, ala-1 ng madaling araw nang maganap ang pamamaril. Nakatayo ang biktima sa isang eskinita malapit sa kanyang bahay nang dumating ang salarin at walang sabi-sabing pagbabarilin siya saka mabilis na tumakas.
Sa panayam sa mister ng biktima na si Ronilo Domingo, 61, isang mangingisda, wala siyang alam na motibo kung bakit papatayin ang kanyang misis habang wala rin siyang kilalang kaaway nito.
Patuloy pa rin ang isinasagawang imbestigasyon sa insidente.