MANILA, Philippines — Tinatayang mahigit sa P3 milyong halaga ng shabu ang nakumpiska mula sa nadakip na dalawang drug pusher sa operasyong isinagawa ng Regional Drug Enforcement Unit nitong Biyernes ng gabi sa Taguig City.
Nakakulong ngayon sa NCRPO ang mga suspect na sina Jayson Esguerra at Rodolfo Dejos, kapwa taga- Brgy. Manuel ng naturang lungsod.
Ayon sa tanggapan ni NCRPO Director Guillermo Eleazar, Biyernes ng gabi nang magkasa ng buy-bust operation ang kanyang mga tauhan kontra sa mga suspect sa nabanggit na barangay.
Ito’y matapos silang makatanggap ng report hinggil sa pagtutulak ng droga ng mga suspect. Nakumpiska mula sa mga suspect ang mahigit sa kalahating kilong shabu na nagkakahalaga ng nasa P3 milyon na nakalagay sa anim na plastic bag, 150 pirasong anti-depressed drugs, marked money na halagang P1,000.00 at budol money.
Nabatid na inamin ng isa sa mga suspect na si Esguerra, na napag-utusan lamang sila ng isa nilang kaibigan na nakakulong sa Metropolitan Manila District Jail sa Camp Bagong Diwa, Bicutan, Taguig City.
Inamin din nito na nagbabagsak din sila ng droga sa area ng Taguig, Pasig City at Cainta, Rizal.
Ang mga suspect ay sinampahan ng kasong paglabag sa pagbebenta ng ipinagbabawal na gamot.