MANILA, Philippines — Isang drug suspect ang nasa kritikal na kondisyon matapos nitong tangkaing mang-agaw ng baril sa mga pulis na tumutugis sa kanya kahapon sa Pasay City.
Inaalam pa ng pulisya ang pangalan ng suspect, na ginagamot sa Pasay City General Hospital (PCGH) sanhi ng tama ng bala sa dibdib buhat sa hindi pa batid na kalibre ng baril.
Lumalabas sa report na natanggap ng hepe ng Pasay City Police na si Sr. Supt. Noel Flores, naganap ang insidente alas-11:00 ng umaga sa Orion St., Brgy. 67 ng nabanggit na lungsod.
Una nang nakatanggap ng report ang mga pulis hinggil sa umano’y pagbebenta ng droga ng suspect, dahilan upang magkasa ito ng follow-up operation.
Nang matunugan ng suspect ang mga pulis ay pumasok ito sa kanyang barung-barong at tinangka nitong agawin ang baril ng isa sa mga operatiba hanggang sa nagpambuno.
Dito, na pinutukan ng mga pulis ang suspect hanggang sa tamaan ito kung saan nasa kritikal itong kondisyon sa pagamutan.