MANILA, Philippines — Arestado ng mga otoridad ang isang 59-anyos na umano’y isang movie director sa ikinasang entrapment operation laban sa kanya nitong Sabado sa lungsod ng Quezon.
Dinakma ng mga tauhan ng Criminal Investi-gation and Detection Group (CIDG) ang suspek na si Ike Sadiasa, residente ng No. 126K Mariano St., Brgy. 95, Caloocan, sa aktong tinatanggap nito ang P150,000 mula sa nagrereklamong biktima na si Maria Rosana Alcantara sa isang kilalang fast food chain sa Boni Serrano corner 4th Ave., sa Bagong Lipunan ng Crame, dakong alas-4:45 ng hapon.
Ayon sa hepe ng CIDG-NCR na si Supt. Eleazar Matta, nagpakilalang isang movie director si Sadiasa kay Alcantara may ilang buwan nang nakakaraan at nakumbinsi umano nitong mag-venture ang biktima ng halagang P340,000 para sa isang movie project.
Nang makuha na ni Sadiasa ang naturang halaga ng pera ay hindi na ito umano nagpakita bagama’t nagpadala ng ilang demand letter si Alcantara upang maibalik ang kanyang pera.
Samantala, nitong isang linggo ay aksidenteng nagkita ang dalawa sa Cubao sa Quezon City kung saan patuloy ang pakiusap ni Alcantara na ibalik na lang ang kanyang pera.
Dito ay muling ‘nabilog’ ni Sadiasa si Alcantara upang maituloy na ang sinasabing movie project ay kailangan pa nitong magbigay ng karagdagang P150,000 kung saan ay lumapit na si Alcantara sa mga otoridad na agad namang nagsagawa ng entrapment operation na nagresulta sa pagkakadakip sa suspek.
Nahaharap na ngayon sa kasong swindling, estafa, at grave threat si Sadiasa.