2 Chinese itinumba ng tandem
MANILA, Philippines — Patay ang dalawang Chinese nationals nang pagbabarilin ng riding in tandem habang nakatayo sa ibaba ng United Nations LRT Station, northbound, sa Taft Avenue,Ermita, Maynila, kahapon ng umaga.
Kinilala ni Senior Inspector Rommel Anicete, hepe ng Manila Police District-Homicide Section ang mga biktima na sina Yi Shou Yan, 35, ng Binondo, Maynila at Wu Huai Hong, 30 , ng Sta. Cruz, Maynila.
Dead on the spot si Hong habang naisugod pa sa Manila Medical Center si Yan na idineklarang dead on arrival. Kapwa nagtamo ng tama ng bala ng baril sa ulo ang dalawang biktima.
Ginagamot naman sa Philippine General Hospital ang isang ginang at isang estudyante na tinamaan ng ligaw na bala.
Sa ulat, alas-11:40 ng umaga nang maganap ang pamamaril sa tapat ng Araullo High School, ibaba ng UN LRT station sa Taft Avenue, ilang metro ang distansiya sa MPD headquarters at NBI.
Nilapitan umano ng mga suspek lulan ng motorsiklo ang dalawang biktima at malapitang binaril. Minalas naman na madamay ang dalawa pang biktima na naglalakad sa lugar.
Blangko pa ang pulisya sa motibo sa krimen habang patuloy pa rin ang isinasagawang imbestigasyon ukol dito.
- Latest
