Klase sa paaralan sa Batasan Complex, kanselado sa Lunes
MANILA, Philippines — Kinansela ng Pamahalaang Lungsod ng Quezon ang pasok ng lahat ng antas ng paaralan sa pribado at pampublikong paaralan sa lungsod na malapit sa Batasan Complex sa Lunes.
Ito ay upang bigyang-daan ang ika-tatlong State of the Nation Address (SONA) ni Pangulong Rodrigo Duterte.
Karaniwan nang nagsisikip ang daloy ng trapiko sa mga lugar papasok at palabas ng Batasan Complex dahil sa mga papuntang sasakyan doon at dulot din ng mga protesta kaya’t minabuti ng lokal na pamahalaan na kanselahin ang pasok ng mga mag-aaral.
Sa abiso naman kahapon ng Metropolitan Manila Development Authority (MMDA), isasara sa mga motorista ang portion ng Commonwealth Avenue mula Tandang Sora hanggang Batasan mula alas-12:01 ng madaling araw ng Lunes.
Kung kaya’t ang mga motoristang magtutungo sa Quezon City ay dumaan na lamang sa mga alternatibong ruta.
Magpapatupad ng re-routing scheme ang MMDA habang hindi pa binubuksan ang mga sinarang kalsada.
Sa Lunes, ikakalat na rin ang mga tauhan ng QC Police at Department of Public Order and Safety ng lungsod para ayudahan ang mga motorista at mga tao sa lugar.
- Latest