Retiradong US Navy timbog sa rape
MANILA, Philippines — Isang retired US Navy ang inaresto kahapon ng mga tauhan ng Quezon City Police District (QCPD) dahil sa reklamong rape na isinampa ng isang menor- de-edad na pamangkin nito.
Kinilala ni QCPD Director, P/Chief Supt. Joselito Esquivel Jr. ang suspek na si Manuel Llara, 56, retired US Navy, nakatira sa Unit 5, Town House 39-B, Bangar St., New Haven Village, Brgy. Kaligayahan, Quezon City.
Ayon sa report, ang panggagahasa umano ng suspek sa kanyang pamangkin na itinago sa pangalang Pinky, 16-anyos ay naganap dakong alas-11:00 ng umaga sa loob ng isang apartelle sa Quirino Highway, Brgy. Greater Lagro.
Sinasabing pumunta ang suspek at biktima sa isang kilalang mall sa Fairview para kunin ang ipinagawang party balloons pero pagdating nila doon ay hindi pa tapos ang mga balloon at sinabing balikan na lamang.
Niyaya naman ng suspek ang pamangkin na kumain muna pero sa halip na sa restaurant dalhin ay ipinasok niya ang dalagita sa apartelle at saka ginahasa sa kabila ng pagmamakaawa nito at tinakot na papatayin kapag magsusumbong.
Pag-uwi sa bahay, agad na nagsumbong ang biktima sa mga magulang na agad na nagreklamo sa himpilan ng pulisya.
Sa isinagawang follow-up operation, naaresto ang suspek at nahaharap ngayon sa kasong paglabag sa R.A. 8353 (Anti-rape Law).
- Latest
