MANILA, Philippines — Isang hindi pa nakilalang babae ang umano’y nag-suicide matapos itong tumalon mula sa ika-apat na palapag ng isang malaking mall sa Edsa, Quezon City kahapon ng tanghali.
Ayon sa pahayag ng isang salesman sa mall ilang minuto bago ang insidente ay nakita pa niya ang nasabing babae na tila balisa at nakatingin sa ground floor.
Nabatid na dakong alas-12:00 ng tanghali nang mangyari ang insidente na ikinagim-bal ng mga mamimili sa mall.
Gayunman, ayon sa ilang testigo laking gulat nila nang bigla na lamang tumuntong sa isang puting upuan ang biktima saka biglang tumalon.
Naisugod pa sa pagamutan ang nasabing babae na tinatayang nasa 30-anyos.
Ayon sa pangasiwaan ng mall agad namang isinugod sa pagamutan ng kanilang Emergency Response Team ang babae pero idineklara na itong dead-on-arrival.
Kasalukuyan na ngayong iniimbestigahan ng Quezon City Police District ang kasong ito habang nakipagkoordinasyon na rin ang pangasiwaan ng mall sa pulisya sa pagsisiyasat sa kaso.