Kelot na pumatay sa aso na nag-viral sa video, arestado
MANILA, Philippines — Sinampahan na kahapon ng patung-patong na kasong kriminal sa Muntinlupa City Police ang lalaki sa viral video sa Facebook na paulit-ulit na pumalo sa ulo ng isang aso hanggang sa mapatay niya ito,
Sa tulong ng Baguio Animal Welfare, nahaharap sa kasong paglabag sa Republic Act No. 8485 o ‘Animal Welfare Act of 1998’ ang suspek na nakilalang si Michael Bobby Potot Jr., alyas Jay-R, ng Brgy. Alabang, ng naturang lungsod.
Bukod dito, sinampahan rin ng mga kasong ‘grave threat, tresspassing at damage to property’ ang suspek ng complainant na si Redge Abela Espanilla at Rea Espanilla, mga may-ari ng pinaslang na asong si Seven.
Sa viral video na umabot na sa 48,000 share, makikita ang isang lalaki na hinahampas ng dos-por-dos sa ulo ang isang aso hanggang sa tuluyang mapatay ito. Kinunan ang video ni Redge Espanilla na sinabing hindi niya nagawang awatin ang suspek dahil sa buntis siya at sa takot na pati siya ay idamay.
Nag-ugat umano ang galit ng suspek sa aso nang habulin ang kanyang batang anak ngunit iginiit ni Espanilla na hindi naman ito nangangagat dahil nang-aamoy lang. Unang hinampas ng kahoy na panlaba ang aso ngunit umuwi at nang bumalik ay may dala nang dos-por-dos na kahoy saka pinasok ang bahay ng mga Espanilla at pinatay ang aso.
May nakalaan na pagkakulong na hanggang dalawang taon at multang aabot sa P100,000 kung mapapatunayan na nagkasala sa Animal Welfare Act. Patuloy namang pinaghahanap ngayon ang suspek.
- Latest