MANILA, Philippines — Isang rider ang nasawi nang mahagip ng bus ang minamaneho nitong motorsiklo kamakalawa ng gabi sa Pasay City.
Nalagutan ng hininga habang nilalapatan ng lunas sa Pasay City General Hospital (PCGH) ang biktimang si Michael Tumaca, ng Tengco St., ng naturang siyudad dahil sa matinding pinsala sa katawan.
Samantala, nasa custody naman ng pulisya ang driver ng Daewoo Bus ( UYD-462) na si Lalaguna Ramos, taga Lirio Street CAA, Las Piñas City.
Sa report na natanggap ng Southern Police District (SPD), naganap ang insidente alas-8:50 ng gabi sa panulukan ng Tramo at Legaspi Sts., Pasay City.
Minamaneho ng biktima ang kanyang Yamaha Mio at habang binabagtas ang lugar ay bigla itong nasalpok ng bus na minamaneho naman ni Ramos.
Sa lakas nang pagkakabangga ay tumilapon ang biktima na nagtamo ng matinding pinsala at dahilan ng kanyang kamatayan.
Sa ngayon ay patuloy na iniimbestigahan ang naturang insidente.