MANILA, Philippines - Patay na nang matagpuan sa loob ng isang kuwarto ng isang hotel ang isang dalaga na bumubula ang bibig, kamakalawa ng hapon sa Caloocan City.
Kinilala ng mga awtoridad ang nasawi na si Lexlyn Joy Bautista, 20-anyos, estudyante, at naninirahan sa Caypombo, Sta. Maria, Bulacan.
Sa ulat ng Caloocan City Police, dakong alas-5 ng hapon nang madiskubre ang biktima sa loob ng Room 394 ng isang hotel sa may EDSA-Monumento.
Nabatid na tinawagan ng telephone operator ang kuwarto na tinuluyan ng biktima dahil sa lagpas na sa kanyang oras ngunit hindi sinasagot.
Nang buksan ng room attendant na si Quimar Margas at kanyang hindi nagpakilalang supervisor ang kuwarto gamit ang duplicate na susi ay tumambad sa kanya si Bautista na bumubula ang bibig.
Rumesponde ang mga tauhan ng Scene of the Crime Operatives at Crime Laboratory Office sa lugar ng krimen upang magsagawa ng imbestigasyon at kumuha ng mga ebidensya para mabatid ang naganap sa loob ng kuwarto ng naturang hotel.
Kabilang sa nirerebisa ang kuha ng “closed circuit television camera” ng naturang hotel upang malaman kung may kasama ang biktima nang mag-check-in o may iba pang naganap sa kuwarto ng nasawi.