MANILA, Philippines - Kapwa nasawi ang isang barangay chairman at isang barangay kagawad nang pagbabarilin ang mga ito ng riding-in-tandem sa magkahiwalay na insidente sa Pasay City, kamakalawa ng gabi.
Dead-on-arrival sa San Juan De Dios Hospital si Brgy. chairman Alberto Arguilles, 49, ng Brgy. 4, Zone 2 ng natu-rang lungsod sanhi ng tinamong tatlong tama ng bala sa hindi pa batid na kalibre ng baril sa iba’t ibang bahagi ng katawan.
Samantala, DOA rin sa Pasay City General Hospital (PCGH) si Brgy. kagawad Moises Aniviado, ng Brgy 61, Zone 8, sanhi ng tinamong tama sa dibdib buhat sa kalibre .45 baril.
Ayon sa report na natanggap ni Supt. Jenny Tecson, chief ng Public Information Office (PIO) at tagapagsalita ng Southern Police District (SPD), alas-7:25 ng gabi nang pagbabarilin si Arguilles habang nakatayo sa panulukan ng E. Rodriguez at Tan Kian Sts., ng nasabing barangay.
Matapos isagawa ang pamamaril kay Arguilles ay kaagad na tumakas ang suspect at umangkas ito sa isang motorsiklo na walang plaka.
Alas-9:30 ng gabi, binaril naman si Aniviado habang nakikipag-inuman sa harapan ng kanyang bahay ng isa rin sa dalawang suspect na lulan ng motorsiklo
Kabilang sa anggulong sinisiyat pulisya ay kung may kaugnayan ito sa papalapit na barangay election.