MANILA, Philippines – Pinagkalooban ng Valentine’s treat ni San Juan Mayor Guia Gomez ang mga guro ng mga public schools sa lungsod.
Nabatid na pagkakalooban sila ng local government ng tig-P2,000 dagdag sa kanilang allowance.
Inatasan kamakailan ng alkalde ang city council na kaagad na aksyunan ang kanyang panukalang madagdagan ang allowance ng mga public school teachers.
Ipinadala na rin ang draft ordinance na naglalaan ng kaukulang pondo para rito.
Ayon kay Gomez, na advocate ng education at family welfare, ikinukonsidera niya ang pagtuturo bilang isa sa pinakamarangal na propesyon kaya’t marapat lamang na kilalanin at bigyan ng katumbas na insentibo.
Ang ordinansa na sinertipikahang urgent ni Gomez ay nakatakdang isailalim sa deliberasyon at aprubahan ng city council ngayong Lunes.