MANILA, Philippines – Patay ang isang tambay matapos burdahan ng saksak ng ‘di pa tukoy na salarin sa Binondo, Maynila, kamakalawa ng gabi.
Kinilala lamang sa alyas na “Dexter Sunog” ang biktimang tinatayang nasa 18-20 taong gulang, umano’y nakatira sa gate 46, Area-B, Parola Compound, Tondo.
Sa inisyal na ulat ni SPO2 Richard Escarlan ng Manila Police District-Homicide Section, dakong 8:45 ng gabi nang makita na lamang ang biktima na tumatakbong duguan sa Juan Luna St., patungong C.M. Recto Avenue sa tapat ng Fiesta Shopping Plaza.
Isang vendor ang nakapansin sa pagkabuwal ng biktima at humandusay na sa kalye.
Nabatid na tadtad ng saksak ang iba’t ibang bahagi ng katawan ng biktima.
Inilagak na sa St. Ivan Funeral Homes morgue ang bangkay habang wala pang kaanak ang nakikipag-ugnayan sa mga awtoridad.
Inaalam na kung sino ang responsable sa pamamaslang at motibo.