MANILA, Philippines – Patay ang isang 45 anyos na bading matapos barilin sa batok ng isa sa apat na suspek na nakitang sumusunod sa kanya kahapon ng madaling araw sa Tondo, Maynila.
Hindi na naisalba pa ng mga manggagamot sa Tondo General Hospital ang biktimang si Carlito Batac, Jr. ng 220 Unit 59 Rodriguez, Tondo, Maynila dahil sa tama ng bala sa batok.
Ayon sa imbestigasyon ni SPO2 John Charles Duran, ng Manila Police District-Homicide Section ala-1:30 ng madaling araw nang maganap ang insidente malapit sa Gate ng Barangay 128 Zone 10 permanent Housing Tondo, Maynila.
Nabatid na bago naganap ang insidente ay may kausap ang biktima at maya-maya pa ay may sumunod na apat na kalalakihan at dito na nakarinig nang putok ng baril.
Inamin naman ng kapatid ng biktima na si Elizabeth na drug user ang biktima at minsan ay nagbebenta ito ng ipinagbabawal na shabu.
Sinisiyasat naman ng pulisya kung may kinalaman sa droga ang motibo nang pagpatay sa biktima.