MANILA, Philippines – Inaasahang tataas ang demand ng kandila dahil sa nalalapit na Undas.
Kaugnay nito, ipinaalala ng Department of Trade and Industry (DTI) sa publiko na may inilabas na itong suggested retail price (SRP) para maging gabay ng mga mamimili sa tamang presyuhan ng mga kandila.
Sinabi ni DTI Consumer Protection Group Undersecretary Atty. Victorio Dimagiba maraming brand ng kandila ang maaaring pagpipilian na higit aniyang mas mura kaysa sa mga kilalang brand.
Nabatid sa DTI na ang 20 pirasong Liwanag Esperma #3 ay may presyong P43.75, habang ang Liwanag Esperma #5 ay may presyong P60.75.
Samantala, ang Manila Wax Esperma #2 (white) ay nabibili sa presyong P44.75 para sa sampung pirasong pack habang ang 20 pirasong Esperma #3 ay may presyong P54.75. Maari umanong makita ang buong listahan ng SRP para sa iba’t ibang brand ng kandila sa website ng ahensiya na www.dti.gov.ph.
Kapag may mahuli umanong sumobra sa presyong itinakda ng SRP, ipinapayo ng DTI na i-report agad sa kanilang pinakamalapit na tanggapan o itawag sa kanilang hotline na 751 3330.
Samantala, sa presyo naman ng bulaklak na inaasahang mataas rin ang demand sa nalalapit na Undas ay binabantayan rin ng ahensiya upang masigurong hindi naman sobra sobra ang pagsirit ng presyo nito bagkus mapanatili ang isang makatwiran at resonableng presyuhan.