MANILA, Philippines — Tinatayang mahigit sa 500 katao ang nasawi sa dalawang bansa matapos ang 7.8 magnitude na lindol na yumanig sa southern Turkey, Lunes ng madaling araw.
Base sa ulat ng CNN, tinatayang 284 ang nasawi at 2,300 ang nasugatan sa Turkey habang sa Syria naman ay 237 ang nasawi at 639 ang sugatan.
Habang sinusulat ang balitang ito ang kabuuang nasawi sa Turkey at Syria ay 521.
Ang nasabing lindol ay pinakamalakas na tumama sa Turkey sa nakalipas na 100 taon kung saan naramdaman din ang pagyanig sa mga kalapit na bansang Israel at Lebanon.
Dahil sa lakas ng pagyanig ay nagbagsakan ang mga gusali doon kaya nagtakbuhan palabas ang mga residente sa mga kalsada.
Base sa ulat, tinatayang 1,700 mga gusali ang nasira sa 10 Turkish cities.
Iba’t ibang lider naman sa buong mundo ang nagpahatid ng pakikiramay at nagpahayag ng kahandaan sa pagtulong sa Turkey at Syria.
Base pa sa ulat, punuan na rin ang mga ospital sa Syria kung saan nakasalansan na lamang ang mga pasyente sa daanan matapos ang malakas na lindol.
Wala pa namang naiulat na Pinoy na nadamay sa nasabing paglindol.
Related video: