4.8 milyong tourist arrivals noong 2022, target ng DOT ngayong taon

MANILA, Philippines — Target ng Department of Tourism (DOT) na maabot ang 4.8 milyong tourist arrivals sa bansa, na doble sa bumisita noong nakalipas na taon.

“Ang target natin this year is 4.8 but of course that is the minimum. Ayaw nating mag-stop doon,” sabi ni DOT Undersecretary Myra Paz Abubakar, sa ulat ng GMA Integrated News nitong Biyernes.

Nakapagtala ng 2.6 milyong turista ang pumasok sa bansa matapos magbukas na ang border ng Pilipinas sa lahat ng international travelers noong Pebrero 2022.

Una nang sinabi ni Pangulong Ferdinand Marcos Jr. na: “Let us reclaim the optimism of both foreign and Filipino travelers as we reap the bounties from the resumption of normal tourism activities.”

Samantala, libu-libo ang pumunta sa taunang Travel Tour Expo na inorganisa ng Philippine Travel Agencies Association sa SMX Convention Center sa Pasay City, sa araw ng pagbubukas nito noong Biyernes, Pebrero 3.

Inaasahan na aabot sa 80,000 hanggang 100,000 guests ang bibista sa nasabing event hanggang ngayong araw, Pebrero 5, para alamin ang mga alok na travel promos ng iba’t-ibang establisimyento at airlines.